ஒன்றமுடியாத ஒன்றிரண்டு... (கவிதைகள்)

ஒன்றமுடியாத ஒன்றிரண்டு...

குடி தண்ணீர் பிடிக்கிற வரிசையில்

நாலாவதாய் நின்ற அக்காவுக்கும்

எட்டாவதாய் நின்ற மாமிக்குமிடையே

ஒன்றரை மணி நேரமாய் ஓயாத

குழாயடிச் சண்டையைப்

பார்த்து அதிர்ந்து படிக்கத் திரும்பிய

சின்னப் பையன் சிவதாணுவுக்கு

இரண்டு ஹைட்ரஜனும் ஓர் ஆக்ஸிஜனும்

சேர்ந்ததுதான் தண்ணீர் என்பதைப்

புரிந்துகொள்ள சிரமமாயிருந்தது.

அவளும்…

பாத்திரத்தை எட்டிப்பார்த்தால்

கொஞ்சம்போல சோறு மிச்சமிருந்தது

பயல் இலையில மிச்சம் வெச்ச

பச்சடி ஒரு மொளறு

எடுத்துப்போட்டு சாப்ட்டதில

ஏழெட்டு மணி மாடாக வேலை செஞ்சதுக்கு

அமுதமாக...

அரை வயித்தை திருப்தியா நெரப்பி

அம்மா வந்து பாத்தபோது

அப்பாவுக்கோ கொழம்பு நல்லா வரல,

பயலுக்கோ தொவரம் உப்பு ஜாஸ்தி.

><><><