மழலை... (கவிதைகள்)

1

காலையில் மெத்தை விரிப்பை

உதற முடியவில்லை மடித்துவைக்க.

இரவில் சொன்ன கதைகள்  

குழந்தைகளிடம் பெற்ற

ஏராளம் ஆச்சரியக் குறிகள்

எங்கும் சிந்திக் கிடந்தமையால்.

><><

2

கதையில் வரும் ராஜகுமாரியாக

தன்னை நினைத்துக் கொள்ளும் குழந்தையிடம்

சொல்ல மனசே வரவில்லை

அவள் படும் கஷ்டங்களை.

><><

3

நான் அவளுடன் பேச

மழலை மொழியொன்றை

வைத்திருக்க,

அவள் பொம்மைகளுடன் பேச

பொம்மை மொழியொன்றை

வைத்திருக்கிறாள்.

><><

4

அத்தனை பொம்மைகளையும்

தாண்டி நீடிக்கிறது

குழந்தையின் அன்புவட்டம்.

><><