அன்றும் இன்றும்...

'அப்பா, அந்திச் சூரியன்

அப்புறம் எங்கே போகுது?'

'ரேடியோவின் உள்ளிருந்து

பாட்டு எப்படி வருது?'

'கமலாவின் அப்பா மட்டும் ஏன்

காலில செருப்பு இல்லாமல் போறாரு?'

மழலைச் சிறுவனாய்

அன்று அவன் கேட்ட போது

'போய்த் தூங்குடா.'

'ஸ்கூலுக்கு டயமாச்சு, புறப்படு.'

'போய் புஸ்தகம் எடுத்துப் படி.'

என்றேன் அப்பா.

இன்று

கம்ப்யூட்டரின் முன்னால்

கவிழ்ந்திருக்கும் மகனிடம்

'டபிள் கிளிக் எப்படி பண்றது?'

'ஈ மெயில் ஐ.டி. எங்கே கிடைக்கும்?'

'ஸீ டிரைவ்னா என்ன?'

என்று கேட்கும்போது

'போங்கப்பா நான் பிஸி.'

'உங்களுக்கு லேசில் புரியாது.'

'தெரிஞ்சு என்ன செய்யப் போறீங்க?'

விரட்டத்தான் செய்வான், இயற்கை.

விசனப்பட என்ன இருக்கிறது?

-- கே.பி. ஜனா
(21-12-2006 'குமுதம்' இதழில் வெளியான என் கவிதை.)