அவள் - (கவிதைகள்)

481

அருகே அருகே வருகிறாய்...
எங்கோ எங்கோ போகிறேன்!

><><

482

என்ன சாப்பிட்டேன்?

நினைவில்லை

என்ன பேசினோம்?

ஒவ்வொரு வார்த்தையும்.

483

நினைந்துன்னை
தொடர்ந்து தும்ம வைத்து
மறந்திடாமலென்னை 
நினைக்கவும் வைத்தேன்.

484.

அது வெறும் பனை வெல்லம்
நீயோ என் கற்பனை வெல்லம்!

485

அழகிழந்து போனதென் இதயம் உன்
அளவிழந்த அன்பின் முன்.

486

ஹரிதாஸ் படம்
மூணு வருஷம் ஓடியதாம்.
என் மனசில் 
எத்தனையோ வருஷமாக
உன் படம்..

487

கொட்டிக் கிடக்கின்றன
உன்னைச் சுற்றிலும்
ஆச்சரியக் குறிகள்!!!

488

தினமும் புதிதாய்ப் பிறக்கிறாய்

என் இதயத்தில்.

489

தரிசிக்க, வேண்டும்
தினம் ஒரு பறவை
தினம் ஒரு மலர்
தின்மும் நீ.

490.

உன் பேரைச் சொன்னதும் 

பூங்காவின் புஷ்பங்கள் 

ஒதுங்கி வழிகாட்டின

உன் இடத்துக்கு.

><><